Presidenti ukrainas, Volodymyr Zelensky, ka shprehur gatishmërinë e tij për të bashkëpunuar me Presidentin amerikan, Donald Trump, dhe për të nënshkruar një marrëveshje për mineralet e rralla, duke theksuar angazhimin e Ukrainës për paqe dhe përpjekjet për arritjen e një armëpushimi me Rusinë. Ai vlerësoi ndihmën e SHBA-së dhe shprehu mirënjohje për raketat “Javelin” të ofruara nga administrata Trump, duke pranuar se takimi i fundit në Shtëpinë e Bardhë nuk shkoi siç pritej, por kërkoi përmirësimin e marrëdhënieve.
Zelensky është përfshirë në negociata me administratën Trump për një marrëveshje mbi mineralet e rralla të Ukrainës. Propozimi fillestar kërkonte që SHBA të merrte 50% të të ardhurave nga burimet natyrore të vendit në këmbim të mbështetjes ushtarake. Zelensky refuzoi marrëveshjen pa garanci sigurie, ndërsa Trump ka sugjeruar se mund të negociojë me Rusinë nëse Ukraina nuk pranon kushtet e tij.
Presidenti ukrainas ka theksuar se vendi i tij është i gatshëm të punojë shpejt për t’i dhënë fund luftës, duke propozuar si faza të para lirimin e të burgosurve dhe një armëpushim në qiell – ndalimin e raketave, dronëve me rreze të gjatë, bombave në energji dhe infrastrukturë tjetër civile – dhe një armëpushim në det menjëherë, nëse Rusia bën të njëjtën gjë. Më pas, ai dëshiron të ecë shpejt nëpër fazat e ardhshme dhe të punojë me SHBA-në për të arritur një marrëveshje të fortë përfundimtare.
Ndërkohë, Presidenti Trump ka kritikuar deklaratat e Zelensky-t lidhur me armëpushimin me Rusinë, duke i cilësuar ato si të papranueshme për Amerikën. Kjo tregon një strategji të qartë dhe pragmatike nga ana e Trump në raport me Ukrainën, duke kërkuar që ndihma amerikane të vijë me përfitime konkrete për SHBA-në.
Marrëveshja për mineralet e rralla është një qasje që siguron burime strategjike për ekonominë amerikane, ndërsa Ukraina merr mbështetje të mëtejshme për mbrojtjen e saj. Trump po vendos interesat e Amerikës të parat dhe po kërkon një balancë mes ndihmës dhe leverdisë ekonomike për vendin e tij.
©️zërionline
