Policia Kufitare e Portit të Durrësit ka goditur një tjetër tentativë për futjen e shumave të mëdha të parave në Shqipëri, pa deklarim në pikën kufitare. Në kuadër të fazës së dytë të operacionit policor të koduar “Aseti”, u arrestua një 40-vjeçar nga Dibra, Jahje Zebi, në furgonin e të cilit u gjetën 108 960 euro dhe 600 franga, të dyshuara si produkt i veprimtarive kriminale.
Shërbimet policore, në bashkëpunim me autoritetet doganore, intensifikuan kontrollet për të parandaluar dhe goditur krimet në kufi. Si rezultat, në vijën e dytë të kontrollit, u evidentua shuma e padeklaruar e parave që po tentohej të futej në vend.
Kjo vjen vetëm tre ditë pas një tjetër operacioni të ngjashëm, ku në portin e Durrësit u sekuestruan 223 200 euro në dalje dhe u arrestua poseduesi i tyre.
Së bashku me shumën e sekuestruar, si prova materiale u konfiskuan edhe furgoni i të arrestuarit, dy celularë dhe pasaporta e tij. Hetimet vijojnë në bashkëpunim me Prokurorinë e Durrësit dhe partnerët për të dokumentuar burimin e këtyre parave.
©️zërionline
