Autoriteti Kombëtar për Sigurinë Kibernetike (AKSK) ka kërkuar zyrtarisht nga operatorët e internetit në Shqipëri të bllokojnë aksesin në aplikacionin TikTok dhe infrastrukturën e tij digjitale. Kjo masë vjen si rezultat i një vendimi të Këshillit të Ministrave, të datës 6 mars 2025, që synon kufizimin e përdorimit të këtij rrjeti social në territorin shqiptar.
Sipas urdhrit të AKSK-së, operatorët duhet të ndalojnë menjëherë qasjen në IP-të, DNS-të dhe SNI-të që lidhen me TikTok, si dhe në IP-të e kompanisë ByteDance, e cila është pronarja e platformës. Këto masa janë të detyrueshme për të gjitha kompanitë që ofrojnë shërbime të komunikimeve elektronike në Shqipëri, bazuar në ligjin “Për komunikimet elektronike” dhe rregulloret përkatëse.
AKSK ka vendosur afatin e 13 marsit 2025 për përfundimin e këtij bllokimi, ndërsa operatorët janë të detyruar të raportojnë në Autoritetin e Komunikimeve Elektronike dhe Postare (AKEP) dhe në vetë AKSK për zbatimin e masave.
Ky vendim ka ngritur debate mbi ndikimin e tij në lirinë e internetit dhe arsyet konkrete që kanë çuar në këtë masë ekstreme. Mbetet për t’u parë nëse do të ketë reagime nga përdoruesit apo nga vetë kompania ByteDance.
©️zërionline
