Pas banorëve të Shkallnurit në Durrës, një tjetër protestë u organizua në Kukës për sigurinë rrugore.
Hyrja e qytetit të Kukësit u bllokua paraditen e sotme nga banorë të Lagjes së re, të cilët protestuan për mungesën e masave të sigurisë në rrugën kombëtare Prizren-Kukës. Të shqetësuar për numrin e lartë të aksidenteve në këtë segment, ata kërkuan ndërhyrje të menjëhershme për zgjerimin e korsive, ndërtimin e trotuareve dhe shtimin e sinjalistikës rrugore.
Sipas banorëve, gjatë shtatë viteve të fundit, kjo rrugë ka marrë jetën e afro 10 qytetarëve. Ngjarja më e fundit ndodhi vetëm një ditë më parë, kur një 51-vjeçar u përplas për vdekje nga një automjet që lëvizte me shpejtësi.
“Kjo rrugë është bërë një kurth vdekjeje! Brenda 7 viteve kemi humbur 10 njerëz dhe askush nuk merr masa. Duam siguri për fëmijët tanë!” – shprehet një prej protestuesve.
Të tjerë banorë theksuan mungesën e ndriçimit dhe të sinjalistikës, duke theksuar se shoferët nuk respektojnë kufizimet e shpejtësisë.
“Nuk ka ndriçim, nuk ka mbikalime, makinat ecin me shpejtësi marramendëse. Një ditë më parë humbi jetën një 51-vjeçar. Sa njerëz të tjerë duhet të vdesin që të veprojnë?” – shprehen ata.
Në fund të protestës, banorët paralajmëruan se do të vijojnë me bllokime të tjera të rrugës nëse institucionet përgjegjëse nuk marrin masa konkrete për përmirësimin e sigurisë rrugore në këtë segment.
©️zërionline
