Një tjetër zjarr ka përfshirë fushën e mbetjeve urbane të qytetit të Vlorës, duke krijuar një situatë të rrezikshme për shëndetin e banorëve dhe turistëve. Flakët, të cilat kanë nisur që mbrëmjen e djeshme, janë përhapur me shpejtësi të ndihmuara nga era e fortë. Ekipet e zjarrfikësve dhe punonjësit e bashkisë po punojnë në terren për izolimin dhe shuarjen e tyre, por zjarret në këtë zonë mbeten një problem i përsëritur.
Përfshirja e vazhdueshme e kësaj fushe nga flakët shkakton çlirimin e tymit toksik, i cili ndot ajrin dhe shkakton shqetësime të mëdha për shëndetin publik. Banorët e zonës shpesh raportojnë probleme me frymëmarrjen dhe irritime të syve, ndërsa edhe turistët që vizitojnë qytetin ndihen të shqetësuar nga ndotja. Sipas specialistëve, e vetmja zgjidhje afatgjatë është largimi i mbetjeve drejt landfillit të Sherishtës, por deri në realizimin e këtij procesi, qyteti do të vazhdojë të përballet me situata alarmante sa herë zjarret përfshijnë fushën e mbetjeve.
©️zërionline
