Policia e Durrësit ka ndaluar një çift turistësh irlandezë, të cilët përvetësuan një shumë prej 42 mijë eurosh, pasi ajo i ra nga xhepi një personi teksa ndaloi për të kontrolluar gomën e pasme të makinës. Paratë i përkisnin një agjencie imobiliare.
Çifti vëzhgoi skenën dhe, sapo dy të rinj nga plazhi që i gjetën paratë, iu afrua duke folur anglisht dhe pretendoi se shuma i përkiste atyre. Të rinjtë, duke besuar fjalët e tyre, ia dorëzuan shumën, ndërsa turistët u dhanë si shpërblim 500 euro dhe u larguan me nxitim në hotel. Më pas, çifti mori rrugën drejt Shkodrës me një automjet me qira.
Si u kapën turistët?
Ngjarja ndodhi më 26 mars, rreth orës 15:30, në lagjen nr. 13 të Durrësit, pranë supermarketit “SPAR”. Përmes sistemit GPS të makinës me qira, policia lokalizoi turistët në Shkodër dhe informoi kolegët e tyre atje. Mbrëmjen e kaluar, në Drejtorinë Vendore të Policisë Shkodër, çifti dorëzoi shumën prej 41,400 eurosh dhe u ndalua me akuzën e vjedhjes.
Policia e Durrësit po vijon hetimet për të zbuluar vendndodhjen e pjesës së mbetur të shumës dhe për të verifikuar origjinën e parave, që sipas denoncimit i përkasin një agjencie imobiliare.
Ndërkohë, pronari i shumës së humbur kishte ofruar një shpërblim prej 5 mijë eurosh për këdo që ndihmonte në gjetjen e përgjegjësve dhe rikuperimin e plotë të parave. Falë reagimit të shpejtë, policia arriti të identifikojë dhe ndalojë çiftin irlandez në kohë rekord.
©️zërionline
