Vendimi i Gjykatës Kushtetuese më 22 prill për çështjen e gazetarit Elton Qyno shënon një moment kyç në mbrojtjen e lirisë së medias në Shqipëri. Pas një procesi të gjatë gjyqësor, Kushtetuesja vendosi të shpallë të pavlefshme kontrollet e kryera nga SPAK në banesën dhe zyrën e Qynos, si dhe sekuestrimin e pajisjeve të tij elektronike, duke theksuar se këto veprime cenonin të drejtën kushtetuese të gazetarit për të ruajtur burimet e informacionit. Ky vendim vjen pas një serie vendimesh të mëparshme nga gjykatat e niveleve më të ulëta, të cilat nuk kishin arsyetuar në mënyrë të mjaftueshme nevojën për ndërhyrje të tilla, duke ngritur shqetësime serioze për respektimin e standardeve demokratike dhe të drejtave të njeriut në raport me lirinë e shtypit.
Unioni i Gazetarëve Shqiptarë ka përshëndetur vendimin e Gjykatës Kushtetuese në lidhje me çështjen e gazetarit Elton Qyno, duke e cilësuar atë si një akt të rëndësishëm në mbrojtje të lirisë së medias dhe të Kushtetutës.
Gjykata Kushtetuese ka vendosur të shpallë të pavlefshme kontrollet e kryera nga SPAK në banesën dhe zyrën e gazetarit Qyno, si dhe sekuestrimin e mjeteve të tij të punës, duke theksuar se e drejta e gazetarit për të ruajtur burimin është një garanci e drejtpërdrejtë kushtetuese. Sipas Kushtetueses, gjykatat e mëparshme nuk kishin ofruar një arsyetim të qartë për përdorimin e masave të tilla ekstreme për të identifikuar burimet.
UGSH vlerëson se ky vendim është një precedent juridik që forcon lirinë e shprehjes, të drejtën për raportim dhe mbrojtjen e burimeve nga ana e gazetarëve. Sipas Unionit, vendimi unanim i Kushtetueses rrëzon çdo përpjekje për të ndërhyrë në punën e gazetarëve dhe për të kufizuar lirinë e medias në vend.
“Ky është një vendim që meriton mbështetjen e gjithë komunitetit mediatik”, thuhet në reagimin e UGSH-së. “Gjykata Kushtetuese ka bërë një shërbim të çmuar për demokracinë ligjore dhe për lirinë e shprehjes në Shqipëri.”
Unioni thekson se do të vazhdojë të ndjekë me vëmendje raste të ngjashme, duke qenë në mbrojtje të të drejtave të gazetarëve dhe të standardeve profesionale të medias.
©️zërionline
