Më 23 prill, bota feston Ditën Botërore të Librit dhe të të Drejtave të Autorit, një ditë e shpallur nga UNESCO që prej vitit 1995, me synimin për të promovuar leximin, botimin dhe mbrojtjen e të drejtave të autorëve. Kjo datë nuk është zgjedhur rastësisht. Ajo përkon me ndarjen nga jeta të tre prej figurave më të mëdha të letërsisë botërore: William Shakespeare, Miguel de Cervantes dhe Inca Garcilaso de la Vega.
Në të gjitha kontinentet, biblioteka, shkolla, shtëpi botuese dhe institucione kulturore organizojnë aktivitete që ftojnë lexuesit e të gjitha moshave të zhytën në botën e librave. Në shumë vende, fëmijët i dhurojnë njëri-tjetrit libra, ndërsa në të tjerë, autorët takohen me lexuesit, duke shkëmbyer ide, emocione dhe pasion për fjalën.
Në Shqipëri, kjo ditë po gjen gjithnjë e më shumë jehonë, me panaire librash, lexime publike, diskutime letrare dhe aktivitete që i japin vëmendje krijimtarisë së autorëve vendas.
Shumë librari dhe panaire libri të organizuara në hollet e qendrave tregtare gjatë këtij muaji për nder të kësaj dite dhe nxitur leximin kanë ofruar ulje nga 10-50 % për çdo libër të shitur.
Në disa shkolla inkurajohen nxënësit të shkruajnë tregime, të lexojnë në grup apo të vizitojnë bibliotekat. Kjo është një mundësi për të rikujtuar rëndësinë e librit si mjet edukimi, frymëzimi dhe zhvillimi personal.
Libri mbetet një dritare e hapur drejt njohjes, një udhëtim që zgjeron mendjen dhe zemrën. Në kohën e teknologjisë dhe informacionit të shpejtë, ai ruan rolin e tij të pazëvendësueshëm si një udhërrëfyes për reflektim dhe thellim të mendimit.
Festimi i Ditës Botërore të Librit na kujton se çdo faqe e lexuar është një hap më pranë një bote më të ndriçuar dhe më të ndjeshme.
Le ta festojmë këtë ditë duke hapur një libër, ndoshta për ta filluar, ndoshta për ta rifilluar, por mbi të gjitha për ta dashur.
©️zërionline
