Në portin e Durrësit ka mbërritur mëngjesin e sotëm superjahti “Opera”, një nga jahtet më të mëdha dhe luksoze në botë, në pronësi të Sheikh Abdullah bin Zayed Al Nahyan, Ministër i Jashtëm i Emirateve të Bashkuara Arabe dhe anëtar i familjes mbretërore.
E ndërtuar në vitin 2022 nga kompania prestigjioze gjermane Lürssen, Opera ka një gjatësi prej rreth 146 metrash dhe vlerësohet në rreth 450 milionë dollarë. Kjo vizitë në Shqipëri lidhet me furnizimin me karburant, një nga arsyet kryesore pse jahtet turistike e zgjedhin portin e Durrësit si ndalesë të preferuar në rajon.
Sipas burimeve portuale, “Opera” do të furnizohet me 320 mijë litra naftë, me një çmim prej 1 euro për litër, ndërsa 20 lekë për litër shkojnë drejtpërdrejt në buxhetin e shtetit. Ky skenar përfitues është bërë një praktikë e zakonshme që po i sjell të ardhura të konsiderueshme ekonomisë shqiptare, falë vizitave të shpeshta të mjeteve lundruese luksoze ndërkombëtare.
Jahtet turistike vazhdojnë ta shohin Shqipërinë si një stacion strategjik në Mesdhe për furnizimin me karburant, falë lehtësirave fiskale dhe shërbimeve portuale në rritje, ndërsa nuk dihet se ku adresohen më pas të ardhurat e siguruara nga i ashtuquajturi turizem i naftës.
©️zërionline
