67-vjeçari Arben Shtraza, i cili tri ditë më parë plagosi me thikë një 70-vjeçar në Durrës, është shfaqur i penduar gjatë seancës gjyqësore për vlerësimin e masës së sigurisë. Para trupit gjykues të kryesuar nga gjyqtari Sokol Mara, ai i kërkoi ndjesë familjarëve të të dëmtuarit, duke shprehur keqardhje për veprimin e tij.
Seanca u zhvillua mesditën e sotme në ambientet e Gjykatës së Durrësit, ku u vendos masa e sigurisë “arrest me burg” për Shtrazën, i cili akuzohet për veprën penale të “plagosjes së rëndë me dashje”.
Ngjarja ndodhi të hënën në lulishten pranë sheshit “Pranvera” dhe filialit të Postës Shqiptare, ku viktima dhe autori, të dy fqinj dhe shokë të përhershëm loje, u përfshinë në një konflikt të çastit teksa luanin domino. Debati degjeneroi në dhunë fizike, ku 67-vjeçari goditi me thikë në bark shokun e tij.
I plagosuri ndodhet ende në spital nën kujdesin e mjekëve dhe gjendja e tij shëndetësore vijon të jetë e stabilizuar, por kërkon monitorim të mëtejshëm. Ndërkohë, hetimet për zbardhjen e plotë të rrethanave të ngjarjes vijojnë.
©️zërionline
