Kryetari i Aleancës për Shqiptarët në Maqedoninë e Veriut, Arben Taravari, ka rikthyer në vëmendje çështjen e statusit të gjuhës shqipe, duke theksuar se ajo nuk gëzon të njëjtin nivel përdorimi zyrtar si në Kushtetutën e vitit 1974, kur Maqedonia ishte republikë në përbërje të ish-Jugosllavisë.
Sipas tij, edhe pse në vitin 1974 gjuha shqipe ishte gjuhë zyrtare, pas shpalljes së pavarësisë në vitin 1991 ajo u përdor, por pa status zyrtar. Vetëm pas Marrëveshjes së Ohrit në vitin 2001, ligji e njohu përdorimin zyrtar në territoret ku shqiptarët përbëjnë mbi 20% të popullsisë.
Ligji i fundit, i vitit 2017, e zgjeron përdorimin e gjuhës shqipe, por Taravari shprehet se “fatkeqësisht, implementimi nuk është ashtu siç duhet”. Ai shton se gjuha shqipe ende përcaktohet si “gjuhë e 20% të popullsisë”, çka sipas tij duhet të ndryshojë, duke e rikthyer statusin e barabartë me gjuhën maqedonase:
“Duhet të jenë dy gjuhë zyrtare në Maqedoninë e Veriut, shqipja dhe maqedonishtja, si gjuhë të dy etnive që përbëjnë 90% të popullsisë.”
Taravari thekson se ka institucione që e anashkalojnë përdorimin e gjuhës shqipe, veçanërisht ato të drejtuara nga maqedonasit, ndërsa aty ku drejtues janë shqiptarë, ligji zbatohet. Ai përmend ekzistencën e një agjencie speciale për përdorimin e gjuhës shqipe, e cila sipas tij nuk funksionon siç duhet dhe nuk ndëshkon shkelësit e ligjit.
Kreu i Aleancës për Shqiptarët shpreh besim se Gjykata Kushtetuese do të marrë një vendim objektiv e racional mbi këtë çështje, pasi një vendim i kundërt “nuk do të ishte i mirë për shoqërinë në tërësi”.
“Në Maqedoninë e Veriut stabilitetin dhe destabilitetin e sjellin dy popujt kryesorë. Shumë e rëndësishme është të ruajmë kohezionin e brendshëm mes tyre. Ne kemi ligje fantastike, por problemi është moszbatimi i tyre”, – u shpreh Taravari.
©️zërionline
