Reshjet e dendura të shiut që kanë përfshirë qytetin e Durrësit sollën sot një bilanc tragjik. Një burrë humbi jetën në rrugën “Mujo Ulqinaku”, pasi dyshohet se ka rënë në kontakt me energjinë elektrike.
Sipas burimeve nga vendi i ngjarjes, viktima kishte hyrë në ujë për të kaluar rrugën e përmbytur dhe dyshohet se është mbajtur tek shtylla në trotuar, e dëmtuar prej ditësh. Kontakti ka qenë fatal dhe dyshohet se i ka marrë jetën në vend.
Bizneset pranë zonës thonë se e kanë raportuar rrezikun që mbarte shtylla, por askush nuk është kujdesur për të. Ata pohojnë se prej të paktën një jave situata ishte e ditur.
Trupi i viktimës qëndron prej më shumë se një orë në rrugë, në pritje të kryerjes së procedurave ligjore. Policia ka rrethuar zonën me shirita kufizues dhe po heton rrethanat e ngjarjes.
Ndërkohë, reshjet e dendura të mëngjesit kanë shkaktuar përmbytje në shumë akse rrugore të qytetit, duke vështirësuar qarkullimin e mjeteve dhe kalimin e këmbësorëve. Shumë kryqëzime janë nën pushtetin e ujit, duke shtuar edhe më tej rrezikun për qytetarët.
©️zërionline
