Policia e Durrësit ka finalizuar operacionin policor të koduar “Space”, pas tre javësh hetime me metoda proaktive, duke goditur një aktivitet kriminal të ushtrimit të prostitucionit në zonën e Plazhit.
Si rezultat i veprimeve hetimore, u arrestuan në flagrancë 3 shtetase kineze, të identifikuara me inicialet M. Y., 41 vjeçe, J. B., 43 vjeçe dhe L. H., 47 vjeçe. Ato kishin marrë me qira një apartament në lagjen nr. 13, Plazh, të cilin e kishin përshtatur për ushtrimin e prostitucionit.
Përveç tyre, janë proceduar penalisht në gjendje të lirë edhe 5 shtetas shqiptarë, të dyshuar për veprën penale “Prostitucioni”. Të referuarit janë me inicialet A. Gj., O. Ll., V. N., A. K. dhe A. G.
Gjatë kontrollit në apartament, forcat e policisë gjetën dhe sekuestruan si prova materiale: 3 pasaportat e shtetaseve kineze, një shumë parash të dyshuar të përfituar nga prostitucioni, 8 aparate celularë dhe 11 karta bankare të lëshuara nga banka të Republikës së Kinës dhe Emirateve të Bashkuara Arabe.
Operacioni “Space” u zhvillua nga Seksioni për Hetimin e Trafiqeve në bashkëpunim me Forcën e Posaçme Operacionale, nën drejtimin e Prokurorisë së Durrësit. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për vijimin e mëtejshëm të hetimeve.
©️zërionline
