Në fshatin Bicaj të Kukësit u zhvillua pasditen e së premtes ceremonia mortore për Bekim Halilajn, 29-vjeçarin që u gjet i pajetë disa ditë më parë në Bruksel, në rrethana ende të paqarta.
Familja Halilaj hapi dyert e mortit, ndërsa familjarë, të afërm, miq e shokë dhe banorë të zonës e të ardhur dhe nga qyteti i Kukësit iu bashkuan dhimbjes së tyre, duke e përcjellë të riun për në banesën e fundit në varrezat e fshatit.
Lajmi i rëndë për ndarjen e tij nga jeta mbërriti nga Belgjika më 30 shtator, kur autoritetet vendase njoftuan se Halilaj ishte gjetur i varur në një tabelë sinjalizimi rrugor në kryeqytetin belg. Hetimet kanë nisur dhe po shqyrtohen të gjitha pistat, përfshirë edhe mundësinë e përfshirjes së elementëve të krimit të organizuar. Burime nga hetimi dyshojnë se në ngjarje mund të jenë të përfshirë katër persona.
Emri i Bekim Halilajt ishte përmendur edhe më herët në median ndërkombëtare. Në vitin 2017 ai u arrestua në Britaninë e Madhe, ku ndodhej në mënyrë të paligjshme, si pjesë e një grupi të dyshuar për trafik kokaine. Për këtë çështje, ai u dënua me shtatë vite burg.
Autoritetet belge pritet të japin detaje të mëtejshme mbi shkaqet dhe rrethanat e vdekjes së 29-vjeçarit nga Kukësi, ndërsa familjarët dhe të afërmit e tij në Bicaj presin zbardhjen e plotë të ngjarjes tragjike.
©️zërionline
