Një situatë kërcënuese ka ndodhur në fshatin Katund Sukth të Durrësit, ku një 46-vjeçar dyshohet se ka kanosur me armë një specialist të Policimit në Komunitet, teksa ky i fundit po kryente shërbimin në zonë.
Sipas Policisë së Durrësit, sapo ka parë punonjësin e Policisë, shtetasi L. Sh., banues në Katund Sukth, ka dalë nga automjeti dhe e ka kërcënuar atë me një armë sportive, të cilën e mbante pa leje.
Shërbimet e Patrullës së Përgjithshme, të cilat ndodheshin pranë zonës për monitorim, ndërhynë menjëherë duke bërë të mundur arrestimin e 46-vjeçarit.
Gjatë verifikimit rezultoi se ai drejtonte automjetin në gjendje të dehur, ndërsa Policia sekuestroi armën sportive (pistoletë) dhe mjetin që ai përdorte.
Materialet iu referuan Prokurorisë së Durrësit, për vijimin e veprimeve të mëtejshme hetimore.
