Kjo javë ka nisur me prezantimin e drejtorit të ri të Institucionit të Ekzekutimit të Vendimeve Penale në Durrës, Indrit Cërloj. Ai merr drejtimin e këtij institucioni pas një periudhe të shkurtër, tranzitore, gjatë së cilës detyra ishte mbajtur në komandim nga Edmond Llabani.
Para këtij emërimi, Cërloj ka ushtruar funksionin e drejtuesit të Inspektoriatit Shtetëror Shëndetësor në Durrës, ku është angazhuar në fushën e kontrollit sanitar dhe shëndetësor, si dhe në fushata të inspektimit gjatë periudhës së pandemisë. Ai është gjithashtu i njohur për angazhimin e tij në jetën publike lokale dhe ka qenë pjesë e Këshillit Bashkiak të Durrësit.
Ndryshimi në krye të burgut të Durrësit vjen në kuadër të riorganizimeve të fundit në institucionet vartëse të Drejtorisë së Përgjithshme të Burgjeve dhe në nivel lokal pas kërkesës së kryeministrit Rama, korrikun e kaluar, për rifreskim të drejtuesve. Cërloj pritet të sjellë një qasje të re menaxheriale në administrimin e institucionit, me fokus efikasitetin në zbatimin e detyrave ligjore.
Burgut të Durrësit i janë vënë shpesh në dukje sfidat që lidhen me futjen e objekteve të ndaluara brenda tij dhe burimet njerëzore, ndërsa drejtori i ri do të ketë përpara një detyrë të rëndësishme për të garantuar funksionimin e qetë dhe të rregullt të këtij institucioni, që mban brenda tij emra të njohur të botës kriminale dhe politikës.
©️zërionline
