Daniel Pepa, 21 vjeç, banues në Manëz të Durrësit, është vënë në pranga nga Specialistët për Krimin Kundër Jetës dhe Pronës në DVP Durrës, pasi u paraqit vetë në polici duke dorëzuar edhe armën e zjarrit që dyshohet se u përdor në ngjarje.
Arrestimi i tij u krye në zbatim të urdhrit të Prokurorisë së Durrësit të datës 14.11.2025, pas vendimit penal të Gjykatës së Shkallës së Parë, e cila kishte caktuar masën “Arrest në burg” për Pepën, si person të dyshuar për veprat penale “Vrasja me dashje” dhe “Mbajtja pa leje e armëve dhe municioneve”.
Ngjarja për të cilën ai akuzohet ka ndodhur më 22 tetor 2025 në Manëz, ku mbetën të vrarë Flori Paluçi dhe Aranit Kurti. Hetimet kanë treguar se Pepa rezulton i implikuar dhe dyshohet si autor i vrasjes së dyfishtë.
Gjatë procedurave të para, policia sekuestroi armën e zjarrit që ai dorëzoi.
Në bashkëpunim me Prokurorinë, vijon puna për zbardhjen e plotë të rrethanave të ngjarjes dhe dokumentimin e saj ligjor.
