Një ngjarje e rëndë me protagonistë të mitur tronditi mbrëmjen e 25 nëntorit lagjen nr. 14/1 në Durrës, ku një konflikt për motive të dobëta degjeneroi në përdorimin e armës së ftohtë. Një 15-vjeçar mbeti i plagosur rëndë me thikë, ndërsa autori i dyshuar, vetëm 14 vjeç, u kap dhe u vu në pranga pas disa orësh kërkim.
Sipas Policisë së Durrësit, menjëherë pas marrjes së njoftimit, shërbimet e Komisariatit organizuan operacionin për zbardhjen e ngjarjes, identifikimin dhe kapjen e autorit. Hetimet e para të kryera nga specialistët e Krimeve të Rënda në bashkëpunim me grupin hetimor të Komisariatit Durrës, treguan se i mituri M. K., 14 vjeç, banues në Durrës, gjatë konfliktit ka goditur me thikë 15-vjeçarin E. B., duke i shkaktuar plagë të rënda.
I dëmtuari ndodhet në Spitalin Rajonal të Durrësit nën kujdesin e mjekëve, ndërsa Policia sekuestroi mjetin prerës të përdorur në ngjarje.
Pas një kontrolli të gjerë në zonë dhe ambiente të ndryshme, shërbimet e Policisë bënë të mundur lokalizimin dhe arrestimin në flagrancë të 14-vjeçarit, i cili akuzohet për veprat penale “Plagosja e rëndë me dashje” dhe “Prodhimi, mbajtja, blerja apo shitja pa leje e armëve të ftohta”.
Materialet i janë referuar Prokurorisë së Durrësit për veprime të mëtejshme.
Në fokus të kësaj ngjarjeje mbetet sërish dhuna në rritje mes të miturve dhe lehtësia me të cilën arma e ftohtë bëhet pjesë e konflikteve të tyre, një fenomen që institucionet kërkojnë të frenojnë me masa të menjëhershme parandaluese.
