Ish-deputeti demokrat, Ervin Salianji nisi sot nga qyteti i Durrësit, bashkëbisedimin me demokratët, për të diskutuar mbi situatën në PD dhe humbjen e zgjedhjeve të majit.
Kjo lëvizje e Salianjit e ka trembur kreun e PD Sali Berisha. Drejtuesit e degës së Durrësit u kanë dërguar kryetarëve të grupseksioneveqë të mos i bashkohen takimit të ish-deputetit sot.
Në mesazhin që u është dërguar thuhet se njoftimi për bashkëbisedim është ndarë nga persona të paautorizuar dhe se kjo lëvizje s’ka të bëjë me PD-në. Më tej, thuhet se kjo thirrje është fund e krye dezinformim, ndërsa u kërkohet demokratëve që të distancohen nga këto të ashtuquajtura takime.
“I nderuar anëtar i PD, dega Durrës! Persona të paautorizuar kanë shpërndarë një njoftim për takim me strukturat tona. Ky njoftim nuk ka të bëjë as me Partinë Demokratike dhe as me agjendën e saj. Ai njoftim është fund e krye dezinformim.
Partia Demokratike sot ka në fokus të betejës së saj korrupsionin Rama–Balluku në Tunelin e Llogarasë dhe aferat e tjera korruptive të tyre. Ndërkohë jemi duke hyrë në procesin e brendshëm të analizës, gjithnjë vetëm brenda forumeve të Partisë. Ndaj ne, si anëtarë të PD-së, distancohemi nga këto të ashtuquajtura takime të njoftuara më datë 3 Dhjetor”, shkruhet në mesazh.
©️zërionline
