Durrësi do të vishet me ngjyra, shije dhe tinguj festash me edicionin e tretë të Panairit “Verë dhe Traditë”, i cili do të zhvillohet nga data 19 deri më 21 dhjetor në Sheshi Liria. Aktiviteti i Bashkisë Durrës synon të sjellë një atmosferë festive për qytetarët dhe turistët, në prag të fundvitit.
Ai ka për qëllim të bashkojë prodhuesit e verës, të cilët janë të shumtë në zonën e Durrësit dhe rrethinat e tij, duke krijuar një hapësirë promovimi për potencialet gastronomike të qytetit dhe fshatrave turistikë përreth. Vizitorët do të kenë mundësi të njihen nga afër me produktet vendase, shijet tradicionale dhe cilësinë e prodhimeve artizanale.
Pjesë e panairit do të jenë edhe artizanë të shumtë, të cilët do të ekspozojnë punime të dorës, me fokus elementë të trashëgimisë kulturore dhe identitetit lokal. Aktiviteti synon të mbështesë jo vetëm prodhimin vendas, por edhe ruajtjen e promovimin e traditave shqiptare.
Atmosfera festive do të plotësohet nga një program i larmishëm artistik, ku do të performojnë artistë të rinj të qytetit, duke sjellë muzikë dhe energji për të gjitha moshat.
Panairi do të hapë dyert të premten, më 19 dhjetor, nga ora 17:00, ndërsa të shtunën dhe të dielën, më 20 dhe 21 dhjetor, aktivitetet do të zhvillohen nga ora 10:00 deri në 24:00.
Ky panair organizohet me mbështetjen e Fondit Shqiptar të Zhvillimit, duke u kthyer tashmë në një traditë për qytetin e Durrësit.
©️zërionline
