Një lajm i bukur dhe plot ndjeshmëri vjen në këto ditë fundviti nga Bashkia e Dimalit. Kryetarja e bashkisë, Juliana Memaj, ka ndarë me ndjekësit një histori që flet për anën humane të njërit prej emrave më të dashur të futbollit shqiptar.
I rritur në kushte të vështira ekonomike, në një familje të varfër, sot ai është një nga futbollistët më të spikatur të Kombëtares kuqezi. Por suksesi nuk e ka larguar nga njerëzit dhe hallet e tyre. Përkundrazi, e ka bërë edhe më të ndjeshëm ndaj atyre që kanë më shumë nevojë për përkrahje.
Me një gjest të thjeshtë, por me domethënie të madhe, futbollisti i Kombëtares sonë, Myrto Uzuni, ka sjellë gëzim dhe emocione të veçanta për fëmijët me aftësi të veçanta dhe për fëmijët me statusin e jetimit, duke i surprizuar me dhurata dhe momente të paharrueshme. Buzëqeshjet e tyre ishin dëshmia më e bukur se sa shumë vlerë ka një gjest i tillë.
Ky akt human dhe simbolik tregon se sporti nuk është vetëm garë, gola dhe fitore, por edhe zemër e madhe, solidaritet dhe kujdes për ata që shpesh mbeten në hije. Është një mesazh i fortë, sidomos për të rinjtë, se suksesi i vërtetë matet edhe me aftësinë për të dhënë dhe për të qenë pranë njerëzve.
Aktiviteti u realizua në bashkëpunim me Zyrën Arsimore, duke sjellë një shembull të bukur bashkëpunimi për kauza me vlerë sociale dhe njerëzore.
Në fund, mbetet vetëm një fjalë e thjeshtë, por e sinqertë: “Faleminderit Myrto Uzuni, për shembullin frymëzues dhe për buzëqeshjet që dhurove në këtë fundvit”, përfundon kryebashkiakja Memaj.
©️zërionline
