Anëtarë të Këshillit Bashkiak të Durrësit kërkojnë transparencë dhe shpjegime të detajuara mbi situatën e krijuar nga përmbytjet e fundit që kanë prekur territorin e bashkisë. Grupi i këshilltarëve të Partia e Lirisë në Këshillin Bashkiak të Durrësit ka dorëzuar sot zyrtarisht një kërkesë për zhvillimin e një interpelance me Kryetaren e Bashkisë Durrës, lidhur me menaxhimin e situatës së jashtëzakonshme.
Sipas këshilltarëve bashkiakë, interpelanca është e domosdoshme për të kërkuar shpjegime të qarta dhe transparente mbi masat e ndërmarra para, gjatë dhe pas emergjencës së shkaktuar nga reshjet intensive, si dhe për të evidentuar përgjegjësitë institucionale për dëmet e shkaktuara te qytetarët, banesat, bizneset dhe infrastruktura publike.
Ata theksojnë se përmbytjet kanë nxjerrë në pah problematika serioze në parandalimin dhe menaxhimin e riskut, duke ngritur shqetësime për reagimin institucional dhe koordinimin e strukturave përgjegjëse në kohë krize.
“Ne kërkojmë llogaridhënie urgjente, transparencë të plotë dhe mbajtje përgjegjësie për mungesën e parandalimit, menaxhimin e situatës dhe reagimin institucional, duke vendosur në qendër interesin dhe sigurinë e qytetarëve të Durrësit”, është shprehur këshilltarja bashkiake Anisa Ibraj.
Kryebashkiakja pritet të shqyrtojë kërkesën, ndërsa qytetarët e prekur nga përmbytjet presin përgjigje konkrete dhe masa reale për përballimin e pasojave dhe parandalimin e situatave të ngjashme në të ardhmen.
©️zërionline
