Situata e krijuar nga përmbytjet në Qarkun e Durrësit paraqitet më e qetë. Uji po tërhiqet, ndërsa strukturat e emergjencave civile deklarojnë se vijojnë punën në terren. Gjatë natës, reshjet e shiut kanë qenë me intensitet të ulët dhe mesatar, pa shkaktuar probleme të reja në akset rrugore apo në rrjedhën e lumenjve.
Në bashkinë Durrës, më e prekura në vend gjatë këtyre përmbytjeve, niveli i ujit në lumenjtë Erzen dhe Ishëm ka shënuar rënie të dukshme, duke e çuar situatën drejt normalizimit. Megjithatë, pasojat mbeten të konsiderueshme. Deri më tani janë evakuuar 848 banorë, janë mbajtur mbi 1450 akte konstatimi dhe janë verifikuar më shumë se 4 067 banesa. Në terren janë angazhuar mbi 500 specialistë që do të vijojnë vlerësimin e dëmeve në ditët në vijim.
Ndihmat ushqimore kanë nisur të shpërndahen për familjet e prekura. Vetëm nga Rezervat Shtetërore janë siguruar mbi 1100 pako ushqimore, të shpërndara në Durrësin e Ri, zonën e Plazhit, Sukth, si dhe për qytetarët e strehuar në ambiente publike. Në njësitë Sukth dhe Katund i Ri janë përmbytur rreth 2800 hektarë tokë bujqësore.
Në bashkinë Krujë, veçanërisht në zonën e Fushë-Krujës, reshjet nuk kanë sjellë probleme të reja, ndërsa lumenjtë Gjole dhe Zezë kanë shënuar rënie të nivelit të ujit. Ka përfunduar gjithashtu mbyllja e çarjes së argjinaturës së lumit Droje. Edhe në bashkinë Shijak, situata paraqitet e qetë, pa problematika të reja të raportuara.
Mes debateve politike mbi funksionimin e hidrovoreve në Durrës, autoritetet lokale theksojnë se ato kanë qenë vendimtare në përballimin e situatës.
Alion Hysko, Drejtor i Ndërmarrjes Rruga që ka në varësi hidrovoret shprehet se “po të mos ishin në funksion hidrovorët, situata do të ishte shumë herë më e rëndë. Të dy hidrovorët e Porto Romanos, si ai i vjetri ashtu edhe i riu, kanë punuar dhe vijojnë të punojnë me kapacitete maksimale për të përballuar prurjet.”
Shtabi i Emergjencave Civile në prefekturën e qarkut Durrës siguron se monitorimi i situatës do të vijojë, ndërsa puna në terren mbetet intensive për menaxhimin e plotë të pasojave nga përmbytjet.
©️zërionline
