Operacioni “Blu Punisher”, dy persona në Tiranë kanë përfunduar në pranga për prodhim dhe shitje të ekstazisë. Në banesën e personave Elvis Lezo, 42 vjeç dhe Bujar Lezo, 59 vjeç, policia gjeti një lloj laboratori që shërbente për ta kthyer produktin në tableta që më pas shiteshin në lokalet e natës të kryeqytetit. Ata kanë lidhje farefisnore xhaxha e nip.
Ekstazi vinte nga Italia në rrugë tokësore, të cilën e shisnin më pas 3000 lekë kokrra. Materialet hetimore iu referuan Prokurorisë për veprime të mëtejshme.
Njoftimi i policisë:
“Finalizohet si rezultat i hetimeve të kryera për disa javë, me metoda proaktive, operacioni policor i koduar “Blue Punisher”.
Kishin përshtatur një ambient në banesën e tyre, për përgatitjen e tabletave të lëndës narkotike ekstazi (MDMA), me qëllim shitjen, vihen në pranga 2 shtetas (të afërm).
Sekuestrohen 2200 tableta me lëndë të dyshuar narkotike ekstazi (MDMA).
Specialistët e Sektorit për Hetimin e Narkotikëve, si rezultat i hetimeve të kryera për disa javë, me metoda proaktive, në drejtimin e Prokurorisë, në kuadër të një procedimi penal në fushën e narkotikëve, kanë organizuar dhe kanë finalizuar operacionin policor të koduar “Blue Punisher”.
Si rezultat i këtij operacioni u arrestuan në flagrancë shtetasit: E. L., 42 vjeç dhe B. L., 59 vjeç, banues në Tiranë (të afërm).
Gjatë operacionit, shërbimet e Policisë kanë ndërhyrë në banesën e këtyre shtetasve, në rrugën “Ali Demi”, ku kanë konstatuar një ambient që ata e kishin përshtatur për përgatitjen e tabletave të lëndës narkotike ekstazi (MDMA), me qëllim shitjen në lokalet e natës.
Gjatë kontrollit në këtë ambient u gjetën dhe u sekuestruan në cilësinë e provës materiale, 2200 tableta me lëndë të dyshuar narkotike ekstazi (MDMA) dhe 2 celularë.
Materialet procedurale iu referuan Prokurorisë, për veprime të mëtejshme”, njofton polica.
©️zërionline
