Në portin më të madh në vend është rikthyer në organogramë posti i Zëvendësdrejtorit të Përgjithshëm, një funksion që prej disa vitesh nuk ekzistonte, pasi ishte hequr nga ish-drejtori Pirro Vengu në kuadër të ristrukturimit të institucionit. Posti u rikthye me vendim Bordi dhe në këtë detyrë është emëruar 24-vjeçari Rubin Rredhi.
Pas përfundimit të Fakultetit të Drejtësisë në Tiranë me rezultate të larta, Rredhi ka punuar për një periudhë të shkurtër si pedagog në të njëjtin fakultet. Më pas, ai është emëruar në postin drejtues në Autoritetin Portual Durrës, duke marrë një përgjegjësi të rëndësishme në një moshë të re.
Autoriteti Portual Durrës përfaqëson nyjën kryesore të transportit detar dhe të përpunimit të mallrave në Shqipëri, që e bën këtë institucion një nga më strategjikët për ekonominë e vendit. Për këtë arsye, çdo emërim në nivelet e larta drejtuese shoqërohet me interes publik dhe kërkesë për transparencë mbi kriteret profesionale dhe përvojën menaxheriale.
Emërimi i një drejtuesi 24-vjeçar në një pozicion kaq të rëndësishëm pritet të nxisë debat mbi balancën mes rinovimit të administratës dhe nevojës për eksperiencë të konsoliduar në menaxhimin e institucioneve strategjike.
©️zërionline
