Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtor një 39-vjeçar nga Lushnja, Marin Leka, i akuzuar për veprën penale të korrupsionit aktiv në zgjedhje.
Sipas vendimit, ai është dënuar fillimisht me 1 vit e 9 muaj burgim. Megjithatë, në zbatim të nenit 406 të Kodit të Procedurës Penale, gjykata ka vendosur uljen e dënimit me një të tretën. Përfundimisht, Leka është dënuar me 1 vit e 2 muaj burg, ndërsa vuajtja e dënimit do të llogaritet që nga momenti i arrestimit ose ndalimit të tij.
Ngjarja ka ndodhur një muaj para zgjedhjeve të 11 majit të vitit të kaluar, kur Leka u arrestua pasi kishte ofruar para në këmbim të votës.
Nga hetimet rezulton se ai i kishte premtuar një qytetari shumën prej 50 mijë lekësh të rinj (rreth 500 euro), me kusht që ai dhe familjarët e tij të votonin për Partinë Demokratike.
Rasti u zbulua dhe u dokumentua nga autoritetet, duke çuar në arrestimin dhe më pas shpalljen fajtor nga GJKKO për manipulim të votës përmes përfitimeve financiare.
Njoftimi i Prokurorisë:
1. Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Gjykimin e çështjes penale që i përket procedimit penal nr. 75, të vitit 2025, në ngarkim të të pandehurit Marim Leka, i akuzuar për kryerjen e veprës penale “Korrupsion aktiv në zgjedhje” parashikuar nga neni 328 i Kodit Penal”.
2. Gjykimi i kësaj ҫështje u zhvillua me rregullat e gjykimit të shkurtuar. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Engjëllushe Tahiri, Atalanta Zeqiraj dhe Besmir Stroka, me vendimin nr. 27, datë 01.04.2026 vendosi:
1. Deklarimin fajtor të të pandehurit Marim Leka për kryerjen e veprës penale “Korrupsioni aktiv në zgjedhje” parashikuar nga neni 328 i Kodit Penal, në zbatim të kësaj dispozite dënimin e tij me 1 (një) vit e 9 (nëntë) muaj burgim.
2. Në aplikim të nenit 406 të K.Pr.Penale uljen e këtij dënimi me 1/3, duke u dënuar përfundimisht i pandehuri Marim Leka me 1 (një) vit e 2 (dy) muaj burgim, vuajtja e dënimit nis nga dita e arrestimit apo ndalimit të tij.
3. Provat materiale të bashkuara me fashikullin e gjykatës, një cd me mbishkrimin “Nr.Marim Leka-M.T”, me përmbajtjen e të dhënave të bisedave ambjentale të zhvilluara midis të pandehurit Marim Leka dhe shtetasit M.T të asgjesohen pasi vendimi të marrë formë të prerë.
4. Shpenzimet hetimore dhe gjyqësore i ngarkohen të pandehurit.
5. Kundër vendimit mund të bëhet ankim në Gjykatën e Posaçme të Apelit për Korrupsionin dhe Krimin e Organizuar, Tiranë, brenda 15 (pesëmbëdhjetë) ditëve, nga e nesërmja e komunikimit të vendimit të arsyetuar.
©️zërionline
