Një operacion i mirëfilltë inteligjence dhe ndërhyrjeje në terren ka goditur një tjetër rrjet prostitucioni në qytetin bregdetar. Operacioni i koduar “Storm 19” ka çuar në pranga një shtetase braziliane, e cila kishte krijuar një “bazë” sekrete në lagjen nr. 4.
Pas një hetimi intensiv dy-javor, Seksioni për Hetimin e Trafiqeve në DVP Durrës, duke përdorur metoda proaktive dhe speciale hetimi, arriti të dokumentonte aktivitetin e paligjshëm që zhvillohej brenda një ambienti të marrë me qira.
Gjatë ndërhyrjes së befasishme të forcave operacionale, situata ka marrë një kthesë dramatike. Shtetasja braziliane, e identifikuar si Sh. S., 24 vjeçe, ka refuzuar t’i bindet urdhrit të policisë duke u mbyllur brenda.
U desh ndihma e shërbimit zjarrfikës për të shqyer derën dhe për të bërë të mundur arrestimin e saj në flagrancë.
Bilanci i operacionit
Përveç arrestimit të 24-vjeçares, Policia e Durrësit ka nisur procedimin penal në gjendje të lirë edhe për 3 shtetas shqiptarë, të cilët akuzohen për veprën penale të prostitucionit.
Në cilësinë e provës materiale u sekuestruan:
- 1 pasaportë e shtetases braziliane;
- Shuma parash (të dyshuara si të përfituara nga aktiviteti);
- 2 aparate celularë (të cilët pritet të zbardhin kontakte të tjera).
Nga hetimet ka rezultuar se e reja nga Brazili e kishte përshtatur qëllimisht ambientin e marrë me qira në Durrës për të ushtruar aktivitetin e prostitucionit kundrejt pagesave monetare.
Materialet i kanë kaluar tashmë Prokurorisë pranë Gjykatës së Shkallës së Parë të Juridiksionit të Përgjithshëm Durrës, e cila do të vijojë me veprimet e mëtejshme procedurale për zbardhjen e plotë të këtij rrjeti.
©️zërionline
