Edhe në periudhën e izolimit, Shqipëria gjeti mënyra të veçanta për të bërë marketing dhe treguar veten përtej kufijve. Një prej tyre ishin pullat postare, ku në hapësira të vogla letre pasqyroheshin peizazhet, qytetet muze dhe imazhet e një vendi që kërkonte të prezantohej në botë.
Në Ditën Ndërkombëtare të Muzeve, shtëpia-ekspozitë “Turistët e Përgjuar” në Durrës, në bashkëpunim me Postën Shqiptare, prezantoi ekspozitën “Filatelia dhe Turizmi në kohën e komunizmit”. Koleksionet e ekspozuara sjellin një udhëtim në kohë, duke treguar mënyrën se si Shqipëria e asaj periudhe ndërtonte imazhin e saj vizual përmes filatelisë.
Sipas eksperteve të turizmit Ariana Isaku dhe Brunilda Liçaj, pullat postare nuk shërbenin vetëm si mjet komunikimi, por edhe si një formë e hershme promovimi kulturor, ku çdo imazh përcillte një mesazh për identitetin e vendit. Sot, ato konsiderohen dëshmi të çmuara historike që ruajnë kujtesën e një epoke të veçantë. Në ekspozitë qe i pranishëm dhe zv.administratori i Postës Shqiptare Ardit Demiri që theksoi rëndësinë dhe funksionin historik të pullave.
Ekspozita, që zgjat vetëm 5 orë, ka ngjallur interes edhe te vizitorët e huaj, të cilët përmes këtyre koleksioneve zbulojnë një Shqipëri ndryshe, të rrëfyer përmes detajeve të vogla por domethënëse. Në këtë mënyrë, filatelia shfaqet jo vetëm si histori postare, por si një dritare e hapur drejt mënyrës se si një vend i izoluar përpiqej të komunikonte me botën.
Sot, më 18 maj, ekspozita do të qëndrojë e hapur deri në orën 15:00.
©ZëriOnline
