Bordi i Transparencës ka ndryshuar sërish çmimet e tavanit për tregtimin e karburanteve në vend. Përmes një njoftimi zyrtar, janë përcaktuar vlerat maksimale me të cilat do të shitet nafta dhe benzina, si me pakicë ashtu edhe me shumicë, vendim i cili hyn në fuqi mesditën e sotme.
Sipas vendimit më të fundit, nga ora 13:00 e ditës së sotme (datë 30), çmimet në pikat e karburantit do të jenë si më poshtë:
- Nafta (Gazoil SSH EN 590) Jo më shumë se 185 lekë/litër
- Benzina (SSH EN) Jo më shumë se 173 lekë/litër
- Nafta për peshkim: 90 lekë/litër
Bordi ka lëshuar një paralajmërim të prerë për të gjithë operatorët e tregut të naftës. Çdo pikë shitjeje, qoftë me shumicë apo pakicë, është e detyruar të pasqyrojë këto çmime menjëherë.
Në rast se konstatohen shkelje apo abuzime me çmimet tavan të vendosura, masat do të jenë ekstreme, sipas Bordit: do të vendoset pezullimi i menjëhershëm i aktivitetit për operatorët thyerës të rregullave.
Për të gjitha anijet e peshkimit, duke iu referuar ligjit për Taksat Kombëtare dhe ligjit për Akcizat, karburanti mbetet i përjashtuar nga taksa e qarkullimit, taksa e karbonit dhe detyrimet e akcizës (nën kushtet e përcaktuara me VKM). Për rrjedhojë, çmimi i naftës për peshkim është llogaritur në 90 lekë/litër.
Këto çmime do të mbeten në fuqi deri në mbledhjen e ardhshme të Bordit të Transparencës, ku pritet të analizohen sërish lëvizjet e tregut ndërkombëtar.
