Historia e protestuesit Altin Hila, i shoqëruar nga policia pas protestës së zhvilluar dje para Parlamentit, ka ngjallur reagime të shumta dhe solidaritet në rrjetet sociale.
Pas publikimit të pamjeve ku ai shfaqet në protestë së bashku me djalin e tij, i cili ka aftësi të kufizuara dhe ushqehet përmes një tubi të lidhur me stomakun, është hapur një fushatë në platformën GoFundMe për të mbështetur familjen e tij.
Sipas organizatorëve të nismës, Hila ka marrë pjesë për 32 ditë radhazi në protestat e mbajtura në Tiranë, ndërsa deklarohet se gjatë protestës së fundit ai u dhunua dhe më pas u shoqërua nga Policia e Shtetit. Këto pretendime nuk janë konfirmuar zyrtarisht nga autoritetet.
“Në shenjë solidariteti me Altin Hilën, po organizojmë këtë mbledhje fondesh për të lehtësuar sadopak situatën e familjes së tij”, thuhet në përshkrimin e fushatës.
Deri tani, sipas të dhënave të publikuara në GoFundMe, janë mbledhur mbi 115 mijë euro nga mbështetës që po ndihmojne familjen e tij.
Organizatorët e fushatës pretendojnë gjithashtu se familja prej vitesh përballet me vështirësi ekonomike dhe se mungesa e Hilës pranë familjes pas shoqërimit nga policia e ka rënduar edhe më tej situatën.
©ZëriOnline
