Një 37-vjeçar është arrestuar nga Policia e Durrësit, pasi dyshohet se grabiti me forcë xhiron ditore të një dyqani të një kompanie celulare.
Sipas policisë, ngjarja ndodhi rreth orës 15:15 në lagjen nr. 16 të Durrësit, ku sipas policisë shtetasi Gerald Ramaj, 37 vjeç, dyshohet se hyri në dyqan dhe mori me forcë rreth 100 mijë lekë të rinj, xhiron ditore të biznesit, për t’u larguar më pas nga vendi i ngjarjes.
Menjëherë pas njoftimit, shërbimet e Forcës së Posaçme Operacionale “Shqiponja”, në bashkëpunim me Komisariatin e Policisë Durrës, organizuan kërkimet dhe arritën ta lokalizojnë e ta kapin autorin e dyshuar në lagjen nr. 6 të qytetit.
Nën drejtimin e Prokurorisë, grupi hetimor vijon veprimet për zbardhjen e plotë dhe dokumentimin ligjor të ngjarjes, ndërsa materialet procedurale i janë referuar Prokurorisë për veprime të mëtejshme.
©ZëriOnline
