Ish zv-kryeministrja Belinda Balluku rikthehet në dyert e SPAK më shumë se 9 muaj pasi u mor e pandehur për tenderin e tunelit të Llogarisë. Këtë të premte, ajo iu përgjigj fletëthirrjes së prokurorisë së posaçme dhe qendroi 20 min në këtë institucion.
Ballukut iu komunikua vendimi për zgjatje të afateve të hetimit edhe me 3 muaj të tjerë, pasi prokurorët e posaçëm argumentojnë se u duhet kohë për kryerje të veprimeve të reja hetimore.
Paralelisht Ballukut iu komunikua se u mor e pandehur për akuzën e shkeljes së barazisë në tendera edhe për lotet e tjera të Unazës së Madhe, për të cilët më herët ishte nën hetim.
Pasi la ambjentet e SPAK, ish-numri 2 i qeverisë shqiptare, nuk pranoi të japë deklarime për mediat.
Më herët, në orët e para të mëngjesit para godinës së SPAK, një grup të rinjsh protestuan me pankarta në duar, duke e cilësuar Belinda Ballukuin si “Belaja e pushtetit”. Më pas ata u spostuan prej andej nga forcat e rendit, ndërsa dy protestues u shoqëruan në komisariat.
Prokurorët mendojnë se do sigurojnë prova të reja për korrupsionin e ish- ministres dhe ish-numrit 2 të qeverisë shqiptare.
Ndaj Ballukut janë në fuqi dy masa sigurie; ndalim për të dalë jashtë vendit dhe pezullim nga ushtrimi i funksioneve.
Ndërkohë vijon hetimi për korrupsion e pastrim parash, lidhur me dy tenderë me vlerë mbi 1 mln euro në kohën kur Balluku ishte drejtoreshë e Përgjithshme e “Albcontrol”.
©ZëriOnline
