Tre persona janë arrestuar nga policia e Sarandës në kuadër të operacionit të koduar “Transportuesit”, pasi dyshohet se transportonin lëndë narkotike me qëllim shpërndarjen e saj në Sarandë dhe Ksamil.
Arrestimi i tyre u bë në aksin Nivicë–Sarandë, pranë urës së Kakomesë, ku efektivët ndërhynë duke bllokuar dy automjetet me të cilat lëviznin të dyshuarit. Në pamjet e publikuara nga policia dëgjohen efektivët me thirrjet “Mos lëviz!”, përpara se t’i neutralizojnë dhe t’u vendosin prangat.
Sipas policisë, gjatë kontrollit në automjetin e drejtuar nga A. N., 31 vjeç, ku ndodhej edhe A. C., 30 vjeç, u sekuestruan rreth 5 kilogramë lëndë narkotike cannabis sativa, e cila dyshohet se do të hidhej në treg në Sarandë dhe Ksamil.
Hetimet paraprake kanë zbuluar se K. J., 26 vjeç, udhëtonte me një automjet tjetër dhe kishte rolin e monitorimit të itinerarit, duke sinjalizuar praninë e patrullave të policisë për të shmangur kontrollet.
Operacioni u finalizua pas një hetimi proaktiv trejavor, të zhvilluar me metoda speciale hetimore nga Komisariati i Policisë Sarandë, në bashkëpunim me Drejtorinë e Forcës së Posaçme Operacionale të DPPSh-së dhe Forcën Kombëtare të Sigurisë, Njësia Tiranë, nën drejtimin e Prokurorisë së Sarandës.
Sipas autoriteteve, dy prej të arrestuarve kanë precedentë penalë në fushën e narkotikëve, ndërsa 31-vjeçari rezulton i dënuar më parë edhe për armëmbajtje pa leje.
Policia bën me dije se hetimet vijojnë për të dokumentuar të gjithë aktivitetin kriminal dhe për të identifikuar persona të tjerë që mund të jenë të përfshirë në këtë rrjet të dyshuar të trafikimit të lëndëve narkotike.
Materialet procedurale i janë referuar Prokurorisë së Sarandës për veprime të mëtejshme.
©ZëriOnline
