Një 50-vjeçar i shpallur në kërkim ndërkombëtar nga autoritetet italiane është arrestuar në Durrës me qëllim ekstradimin drejt Italisë.
Bëhet fjalë për Gentian Likën, i cili ishte dënuar nga Gjykata e Apelit e Romës me 6 vite burg për veprën penale të trafikimit të narkotikëve. Arrestimi i tij u realizua në kuadër të operacionit policor “FAST”.
Sipas njoftimit të Policisë së Shtetit, shërbimet operacionale të Sektorit për Kërkimin FAST Albania, pjesë e Drejtorisë së Forcës së Posaçme Operacionale, në bashkëpunim me Drejtorinë Vendore të Policisë Durrës, organizuan dhe finalizuan operacionin që çoi në lokalizimin, identifikimin dhe ndalimin e 50-vjeçarit.
Gentian Lika, i lindur në Kavajë, ishte shpallur në kërkim ndërkombëtar pasi Gjykata e Apelit e Romës, me një vendim të dhënë në mars të vitit 2025, e kishte dënuar me 6 vjet burg për trafikim të narkotikëve, kryer në bashkëpunim, sipas legjislacionit penal italian.
Interpol Tirana, në koordinim me autoritetet homologe italiane, po vijon procedurat për ekstradimin e tij drejt Italisë.
“Kapet në Durrës dhe ndalohet me qëllim ekstradimi një shtetas i shpallur në kërkim ndërkombëtar nga autoritetet italiane, i dënuar me 6 vjet burgim për trafikim të narkotikëve.
Në vijim të operacioneve të njëpasnjëshme për lokalizimin, kapjen dhe ndalimin e shtetasve të shpallur në kërkim ndërkombëtar, shërbimet operacionale të Sektorit për Kërkimin FAST Albania, në Drejtorinë e Forcës së Posaçme Operacionale, në bashkëpunim me Drejtorinë Vendore të Policisë Durrës, si rezultat i veprimeve të mirëorganizuara policore, bënë të mundur lokalizimin, identifikimin dhe ndalimin, me qëllim ekstradimin, të shtetasit Gentian Lika, 50 vjeç, lindur në Kavajë.
Ky shtetas ishte shpallur në kërkim ndërkombëtar, pasi Gjykata e Apelit e Romës, Itali, me vendim të muajit mars 2025, e ka dënuar me 6 vjet burgim, për veprën penale “Trafikimi i narkotikëve”, kryer në bashkëpunim, sipas parashikimeve të Kodit Penal të Italisë.
Interpol Tirana, në bashkëpunim me autoritetet homologe italiane, po ndjek procedurat për ekstradimin e këtij shtetasi drejt Italisë”, thuhet në njoftimin e policisë.
