Një konflikt mes dy personave në Spille të Kavajës rrezikoi të përfundonte në tragjedi, pasi njëri prej tyre nxori kallashnikovin dhe dyshohet se tentoi të vriste kundërshtarin. Ndërhyrja e shpejtë e Policisë parandaloi përshkallëzimin e situatës dhe një krim të mundshëm me pasoja fatale.
Në pranga përfundoi 31-vjeçari Neldi Hallulli, i cili u kap në flagrancë me armën e zjarrit. Policia sekuestroi kallashnikovin së bashku me municion luftarak, në cilësinë e provës materiale.
Ngjarja u regjistrua në Spille, një ditë më parë, ku shërbimet e Komisariatit të Policisë Kavajë dhe Postës së Policisë Rrogozhinë u vunë në lëvizje pas informacionit për një konflikt që po ndodhte në zonë. Ndërhyrja e shpejtë bëri të mundur neutralizimin e situatës përpara se arma të përdorej.
Sipas hetimeve paraprake, Hallulli ishte konfliktuar me 38-vjeçarin Indrit Rama dhe, pas përplasjes, dyshohet se kishte marrë kallashnikovin me qëllim për ta vrarë.
Edhe Rama është proceduar penalisht, pasi dyshohet se gjatë konfliktit ka goditur me grushte Hallullin, duke i shkaktuar dëmtime të lehta trupore.
Materialet procedurale i janë referuar Prokurorisë për veprime të mëtejshme.
©ZëriOnline
