Një ndërtim 6-katësh pa leje në Qeparo ka sjellë masa të forta nga Bashkia Himarë ndaj strukturës së Inspektoratit të Mbrojtjes së Territorit.
Kryetari i Bashkisë Himarë, Vangjel Tavo, ka vendosur të shkrijë strukturën e IMT-së, ndërsa 6 punonjës të saj, drejtues dhe inspektorë, janë shkarkuar nga detyra.
Sipas burimeve, punonjësit dyshohet se kanë lejuar ndërtimin e një objekti 6-katësh në Qeparo, pa lejen përkatëse.
Për këtë rast, dosja është referuar në Prokurori, ndërsa ndaj 6 punonjësve ka nisur hetimi për të përcaktuar përgjegjësitë e tyre lidhur me lejimin dhe moskontrollin e ndërtimit.
Kryebashkiaku Vangjel Tavo e ka argumentuar më herët vendimin me mosfunksionimin e kësaj strukture dhe mospërmbushjen e detyrave funksionale, përfshirë kontrollet në terren.
Me shkrirjen e IMT-së, funksionet e kontrollit dhe inspektimit të territorit që mbuloheshin nga kjo strukturë do të kryhen nga Inspektorati Kombëtar i Mbrojtjes së Territorit, IKMT.
Ndërkohë, ndërtimi 6-katësh në Qeparo mbetet nën hetim, ndërsa pritet që Prokuroria të përcaktojë nëse ka pasur shkelje dhe përgjegjësi konkrete nga ana e punonjësve të strukturës së inspektimit.
©ZëriOnline
