Gjatë një aksioni të Policisë së Shtetit kundër kultivimit të lëndëve narkotike në fshatin Kodërbojë të Pukës, një person i armatosur i është shmangur kontrollit të efektivëve.
Sipas të dhënave paraprake, gjatë operacionit për asgjësimin e një parcele me bimë të dyshuara narkotike, shërbimet e policisë kanë pikasur një shtetas të armatosur. Në momentin që ka konstatuar praninë e forcave të rendit, ai është larguar me shpejtësi duke mos iu bindur urdhrit të tyre për të ndaluar.
Për ta paralajmëruar dhe ndaluar arratisjen e tij, një nga punonjësit e policisë ka qëlluar me armë zjarri në ajër. Megjithatë, duke shfrytëzuar terrenin e thyer malor dhe dendësinë e zonës, personi i armatosur ka mundur të largohet.
“Një nga punonjësit të Policisë ka qëlluar me armë zjarri në ajër, për ta paralajmëruar, por personi i armatosur, duke përfituar nga terreni, ka mundur të largohet”, thuhet në njoftimin e policisë.
Grupi hetimor, nën drejtimin e Prokurorisë, po punon për zbardhjen e plotë të rrethanave dhe identifikimin e të dyshuarit. Ndërkohë, strukturat e Drejtorisë Vendore të Policisë Shkodër, Komisariatit të Pukës dhe Forcat Kombëtare të Sigurisë (FKS) kanë rrethuar zonën dhe po vijojnë krehjen e terrenit për kapjen e tij.
Pak ditë më parë, policia ndaloi në të njëjtën zonë një kultivues hashashi.
©ZëriOnline
