Autoritetet në Florida njoftuan gjetjen e 163 fëmijëve të zhdukur si pjesë e një operacioni historik në të gjithë shtetin.
Aksioni i quajtur “Operacioni Mburoja Shtetërore” ishte më i madhi në historinë e shtetit dhe çoi në gjetjen e fëmijëve të zhdukur të moshave nga 2 muaj deri në 17 vjeç. Autoritetet gjetën fëmijë në të gjithë shtetin e Floridës, shtatë shtete dhe territore të tjera të SHBA-së, si dhe 12 vende, përfshirë Brazilin, Kolumbinë, Meksikën, Xhamajkën dhe Ganën.
Sipas autoriteteve vendase, shumë fëmijë të rikuperuar kishin përjetuar nivele të ndryshme abuzimi, neglizhence, shfrytëzimi ose ekspozimi ndaj aktiviteteve të tjera kriminale, përfshirë trafikimin e qenieve njerëzore. Fëmijët u dërguan në qendra të caktuara rikuperimi, ku po marrin mbështetje nga shërbimet sociale, profesionistët e mirëqenies së fëmijëve, ofruesit e shërbimeve mjekësore, avokatët e viktimave dhe burime të tjera të përqendruara te fëmijët.
Sipas mediave të huaja, në pranga deri tani kanë rënë 3 persona, dy prej të cilëve ishin akuzuar më parë për ngacmim dhe abuzim seksual me të mitur.
Dy prej të arrestuarve përballen me akuza për vepra seksuale ndaj të miturve, ndërsa i treti u arrestua për ndërhyrje në kujdestari dhe rezistencë ndaj policisë. Autoritetet kanë paralajmëruar edhe arrestime të tjera.
Përsa i përket mënyrës se si ishin zhdukur fëmijët, autoritetet njoftuan se në disa raste ata ishin rrëmbyer nga të afërm që ishin në konflikt për kujdestarinë e tyre, e në raste të tjera, ishin rrëmbyer nga persona që nuk kishin lidhje familjare me ta.
Rastet e zbuluara përfshinin dhe arratisje nga shtëpia, konflikte kujdestarie, neglizhencë, abuzim dhe raste të trafikimit.
