Detaje të reja janë zbardhur nga shpërthimi me lëndë plasëse i regjistruar në orët e para të mëngjesit në ambientet e jashtme të një lokali në Durrës.
Mësohet se lokali është në pronësi të Gëzim Kajnos, i cili rezulton i dënuar për vrasjen e Asllan Kërtushës në vitin 2016. Kërtusha, sipas të dhënave të raportuara për ngjarjen e asaj kohe, kishte qenë klient në lokalin e Kajnos.
Shpërthimi ndodhi rreth orës 03:50, në lagjen nr. 11 të Durrësit, ku një sasi e vogël lënde plasëse u hodh në derën e jashtme të lokalit. Nga shpërthimi u shkaktuan vetëm dëme të lehta materiale dhe nuk raportohet për persona të lënduar.
Vetëm rreth 40 minuta më vonë, një tjetër shpërthim me lëndë plasëse u regjistrua në zonën e Shkallnurit. Rreth orës 04:30, në anë të rrugës Plepa–Ndroq, lënda plasëse u hodh në derën e garazhit të një automjeti, duke shkaktuar dëme materiale.
Deri më tani nuk është bërë e ditur nëse dy shpërthimet kanë lidhje me njëri-tjetrin. Po ashtu, nuk ka të dhëna zyrtare që e lidhin sulmin ndaj lokalit me të kaluarën e pronarit.
Grupet hetimore, nën drejtimin e Prokurorisë, po punojnë për administrimin e provave, zbardhjen e rrethanave dhe identifikimin e kapjen e autorit apo autorëve.
Si ndodhi krimi në 2016?
Gëzim Kajno është dënuar me 10 vite burg për vrasjen e Asllan Kërtushës në vitin 2016, si dhe për armëmbajtje pa leje. Fillimisht, Gjykata e Shkallës së Parë e kishte dënuar me 6 vite burg, dënim të cilin Kajno e kishte përfunduar, por pas ankimit të Prokurorisë çështja përfundoi në Gjykatën e Lartë. Në vitin 2023, kjo e fundit la në fuqi një dënim prej 10 vitesh, duke bërë që Kajnos t’i mbeteshin edhe katër vite për të vuajtur. Ai u ndalua më pas nga Policia e Durrësit për ekzekutimin e vendimit.
Ngjarja për të cilën u dënua ndodhi në vitin 2016. Asllan Kërtusha, 29 vjeç, ndodhej në lokalin e Kajnos, ku nisi një konflikt pas fyerjeve ndaj klientëve. Pronari i lokalit, Gëzim Kajno i ka kërkuar Kërtushës që të mos fyejë klientët. Pas konfliktit në lokal, sherri u spostua jashtë. Kërtusha tentoi të largohej me taksi, por u nxor me dhunë nga makina nga Gëzim Bledar Kajno, i cili e qëlloi me plumb në zemër.
“Rreth orës 03:50, në lagjen nr. 11, Durrës, në derën e jashtme të një lokali në pronësi të shtetasit G. K., është hedhur një sasi e vogël lënde plasëse. Si pasojë, janë shkaktuar vetëm dëme të lehta materiale.
Gjithashtu, rreth orës 04:30, në zonën e Shkallnurit, në anë të rrugës Plepa–Ndroq, është hedhur një sasi lënde plasëse në derën e garazhit të një automjeti, duke shkaktuar vetëm dëme materiale.
Grupet hetimore, nën drejtimin e Prokurorisë, po vijojnë veprimet për mbledhjen dhe administrimin e provave, zbardhjen e plotë të rrethanave, si dhe identifikimin dhe kapjen e autorit/autorëve.”, njofton policia.
©ZëriOnline
