Prokuroria e Posaçme kundër Korrupsionit dhe Krimit të Organizuar (SPAK), ka reaguar zyrtarisht për arrestimin e administratorit të shoqërisë “ECO-ELB” sh.a., Leli Kaja.
Sipas njoftimit të SPAK, hetuesit e Byrosë Kombëtare të Hetimit (BKH) kanë arrestuan në flagrancë, Leli Kajën, i dyshuar për veprën penale “Korrupsioni pasiv i personave që ushtrojnë funksione publike”.
Sipas Prokurorisë së Posaçme, nga veprimet hetimore të kryera deri në këtë fazë dyshohet se administratori i “ECO-ELB” i ka kërkuar dhe më pas i ka marrë administratorit të një operatori ekonomik shumën prej 400 mijë lekësh.
Prokuroria e Posaçme thotë se kjo shumë dyshohet se është marrë si përfitim i paligjshëm, në këmbim të moskryerjes së detyrave që ligji i ngarkon Kajës në cilësinë e administratorit të shoqërisë. Gjatë kontrollit personal, hetuesit i kanë gjetur dhe sekuestruar Kajës shumën prej 400 mijë lekësh
“Hetuesit e Byrosë Kombëtare të Hetimit (BKH), nën drejtimin e prokurorit të çështjes, sot, më 5.10.2026 arrestuan në flagrancë shtetasin L.K., administrator i shoqërisë “ECO-ELB” sh.a., i dyshuar për kryerjen e veprës penale “Korrupsioni pasiv i personave që ushtrojnë funksione publike”, e parashikuar nga neni 259, paragrafi 2, i Kodit Penal.
Arrestimi u krye në kuadër të procedimit penal nr. 108 të vitit 2026, të regjistruar më datë 1.10.2026 nga Prokuroria e Posaçme kundër Korrupsionit dhe Krimit të Organizuar, mbi bazën e referimit të BKH-së. Gjatë hetimit u përdorën metoda speciale të hetimit dhe veprime të simuluara.
Nga veprimet hetimore të kryera deri në këtë fazë, dyshohet se shtetasi L.K. ka kërkuar dhe marrë nga administratori i një operatori ekonomik shumën prej 400.000 (katërqind mijë) lekësh, në formën e përfitimit të paligjshëm, në këmbim të moskryerjes së detyrave që i ngarkon ligji si administrator i shoqërisë “ECO-ELB” sh.a.
Gjatë kontrollit personal, shtetasit L.K. iu gjet dhe iu sekuestrua shuma e sipërpërmendur. Hetimet vijojnë për zbardhjen e plotë të rrethanave të rastit dhe identifikimin e personave të tjerë të përfshirë”, thuhet në njoftimin e SPAK.
