Kuvendi i Kosovës ka miratuar në parim projektligjin që parashikon ndryshime dhe plotësime në Ligjin për Dhomat e Specializuara dhe Zyrën e Prokurorit të Specializuar.
Projektligji kaloi pas shqyrtimit dhe debatit në seancën e jashtëzakonshme të Kuvendit, duke i hapur rrugën vijimit të procedurave parlamentare. Në votim morën pjesë 91 deputetë, të cilët mbështetën unanimisht nismën.
Projektligji kishte marrë më herët edhe miratimin e Komisionit për Legjislacion, ku kaloi me 9 vota pro dhe asnjë kundër.
Kryeministri Albin Kurti tha se lufta e UÇK-së ishte e drejtë dhe se UÇK-ja nuk ishte vetëm përgjigje ndaj suprimimit të autonomisë së Kosovës, por edhe ndaj gjenocidit të Serbisë ndaj Kosovës.
“Për UÇK-në nuk mund të ketë gjyq”, tha Kurti.
Duke folur për ndryshimet në Ligjin për Dhomat e Specializuara, ai tha se koha për analizimin e tyre ka qenë e shkurtër dhe se LVV-ja i konsideron këto veprime të ngutshme.
“Ka qenë një kohë e shkurtër për të analizuar ligjin, sidomos kur nuk e kemi aktgjykimin e prerë. Këto lëvizje për ndryshimin e ligjit për Specialen janë të ngutshme dhe nuk janë analizuar sa duhet. Veprime të ngutshme janë bërë edhe në vitin 2015. Atëherë nuk na keni dëgjuar, por sot do të duhej të na konsultoni. Zemërimi i qytetarëve është i drejtë. Ankesat për gjykatën duhet t’u drejtohen atyre që e themeluan e jo ndaj atyre që e kundërshtuan.
Duhet ligj për Gjykatën në Hagë por edhe president për Kosovën. S’mund të bëhet njëra pa tjetrën. Na duhet një strategji serioze, por për ta zbatuar atë strategji na duhen institucione funksionale. Një ligj për Hagën pa stabilitet institucional, rrezikon të përfundojë në dështim”, tha ai
Paralelisht me zhvillimet brenda sallës së Kuvendit, jashtë godinës po vijon protesta e veteranëve të UÇK-së dhe mbështetësve të ndryshimeve ligjore.
Protesta është shoqëruar me tensione gjatë zhvillimit të seancës. Protestuesit kanë hedhur edhe mjete piroteknike në drejtim të godinës së Kuvendit.
