Përplasjet mes studentëve dhe policisë në Durrës kanë vijuar edhe këtë të premte, me shoqërimin e 27 studentëve në komisariat pas një përballjeje me efektivët në ambientet e Universitetit “Aleksandër Moisiu”.
Ndërkohë, nga 35 personat e shoqëruar gjatë protestës së djeshme, 25 janë arrestuar, mes tyre edhe të mitur, ndërsa të tjerët do të ndiqen në gjendje të lirë.
Mes personave të shoqëruar një ditë më parë ishte edhe avokatja Merita Çela Dakovelli, e cila ndodhej pranë komisariatit për të ofruar ndihmë ligjore për një prej protestuesve. Ndryshe nga personat e tjerë të përfshirë në ngjarje, ndaj saj nuk është nisur procedim.
Pas zhvillimeve të dy ditëve të fundit, protestuesit kanë paralajmëruar një tjetër tubim sot në orën 12:30, përpara Bashkisë së Durrësit, duke sinjalizuar vijimin e protestave.
©ZëriOnline
