Bojkoti i procesit mësimor i thirrur nga Sindikata e Punonjësve të Universiteteve të Shqipërisë nuk po zbatohet në të njëjtën masë në të gjitha universitetet publike, ndërsa pedagogët dhe studentët në rrethe kanë mbajtur qëndrime të ndryshme.
Sot më 22 tetor, në Universitetin “Aleksandër Moisiu” në Durrës, mësimi vijon pjesërisht. Edhe pse shumë pedagogë kanë firmosur peticionin në mbështetje të kërkesave, kjo nuk është përkthyer në një bojkot të plotë të procesit mësimor.
Në Universitetin e Korçës, bojkoti vijon pjesërisht, ndërsa Këshilli Studentor ka mbështetur vazhdimin e tij. Ndërkohë, në Universitetin e Shkodrës dhe atë të Gjirokastrës, procesi mësimor raportohet se po zhvillohet normalisht.
Situata paraqitet e ndryshme edhe në universitetet e tjera, ku zbatimi i bojkotit varet nga pjesëmarrja e pedagogëve dhe studentëve.
Thirrja për bojkot vjen në një kohë kur protestat studentore vijojnë në vend, me kërkesa që lidhen me kushtet e studimit dhe problematikat në arsimin e lartë.
©ZëriOnline
