Policia e Durrësit ka ekzekutuar një vendim penal të Gjykatës së Posaçme të Shkallës së Parë për Korrupsionin dhe Krimin e Organizuar, i cili u la në fuqi edhe nga Gjykata e Apelit, për konfiskimin e një pasurie të dyshuar të përfituar nga veprimtaria kriminale.
Në zbatim të këtij vendimi, Seksioni për Hetimin e Krimeve Ekonomike dhe Financiare në Drejtorinë Vendore të Policisë Durrës sekuestroi një sipërfaqe prej 1050 metra katrorë truall, së bashku me një objekt banimi njëkatësh që përfshinte oborr dhe pishinë, në përdorim të shtetasit Luan Kërtalli. Pasuria iu dorëzua Agjencisë për Administrimin e Pasurive të Sekuestruara dhe të Konfiskuara, në prani të familjarëve të Luan Kërtallit.
Sipas hetimeve, rezulton se kjo pasuri është përfituar nga veprimtaria kriminale e dy djemve të L. K., të cilët janë në hetim për vepra të rënda penale. Dy vëllezërit, që janë subjekt i një procedimi penal të nisur në vitin 2017, dyshohen për përfshirje në “vrasje në rrethana të cilësuara, kryer në bashkëpunim”, si dhe për “mbajtje pa leje dhe prodhim të armëve, armëve shpërthyese dhe municionit”.
Për më tepër, ata janë nën hetim edhe për “falsifikim të letërnjoftimeve, pasaportave ose vizave”, dhe “falsifikim të vulave, stampave ose formularëve”.
Ky është një tjetër rast ku autoritetet gjyqësore dhe policore ndërhyjnë për të sekuestruar pasuritë e përfituara në mënyrë të paligjshme, në përpjekje për të goditur burimet ekonomike të krimit të organizuar dhe për të forcuar luftën kundër aktiviteteve kriminale në vend.
©️zërionline
