Kur përmendim Dubain, imazhi që shpesh na vjen në mendje është ai i rrokaqiejve që prekin retë, makinave superluksoze që rrëshqasin në autostrada të ndriçuara dhe një jete që sfidon realitetin me luksin e saj. Por vetëm disa kilometra larg këtij spektakli të ndriçuar, në zemër të shkretëtirës, ndodhet një tjetër realitet, po aq futurist, por me një filozofi krejt të kundërt, Qyteti i Qëndrueshëm (The Sustainable City).
Ky qytet i vogël, por me një ide të madhe, është shtëpia e 500 vilave të ndërtuara me vizionin e së ardhmes. Nuk është thjesht arkitektura që e bën të veçantë, por mënyra se si ky komunitet jeton në harmoni me natyrën, madje edhe në një nga klimat më sfiduese në botë. Çdo vilë është projektuar të jetë energjikisht e pavarur, falë një sistemi gjigant panelesh diellore që mbulojnë çatitë dhe hapësirat e parkimit, duke prodhuar energji të pastër dhe të qëndrueshme.
Por teknologjia është vetëm njëra anë e medaljes. Në këtë qytet, bujqësia urbane nuk është një koncept për të nesërmen, por një realitet i përditshëm. Në 11 serra të mëdha komunale, banorët rrisin fruta dhe perime të freskëta, duke ndarë të mirat me komunitetin dhe duke ulur varësinë nga importet.
Ndoshta pjesa më befasuese është heshtja. Jo për shkak të ndonjë rregulli të ashpër, por sepse makinat janë thuajse të përjashtuara nga lëvizja brenda lagjes. Banorët ecin, përdorin biçikleta ose karroca elektrike të përbashkëta, duke e kthyer përditshmërinë në një përvojë të qetë, të pastër dhe njerëzore.
Qyteti ndodhet rreth 30 kilometra nga qendra e Dubait, në Emiratet e Bashkuara Arabe, dhe është ndërtuar nga kompania Diamond Developers. Ai është konceptuar dhe zhvilluar si një model urban i gjelbër dhe ka qenë funksional që nga viti 2015.
“Qyteti i Qëndrueshëm” nuk është një eksperiment i izoluar, por një dritare drejt asaj që qytetet e së ardhmes mund të bëhen. Një vend ku teknologjia nuk shërben për të nxitur konsumin, por për të ndërtuar një jetë më të mirë, më të pastër dhe më të drejtë për të gjithë.
Qyteti është vlerësuar ndërkombëtarisht për arritjet e tij në energji të rinovueshme, menaxhim mbetjesh, dizajn urban dhe vetë-mjaftueshmëri. Ai është cilësuar si projekti i parë me emetime të ulëta karboni në Lindjen e Mesme që është funksional dhe i banueshëm në shkallë të gjerë.
Në mes të një shkretëtire që dikur përfaqësonte boshllëkun, është mbjellë një ide që mund të frymëzojë botën, sepse ndoshta e ardhmja nuk është në garë për më shumë, por në zgjedhjen për të jetuar më mirë.
©️zërionline
