Një situatë alarmante është regjistruar pasditen e sotme në Malësi të Madhe, ku disa vatra zjarri kanë shpërthyer në mënyrë të njëkohshme në zonat e Rrëzës, Veshtit, Delajt dhe fshatit Jeran, në njësinë administrative Kastrat.
Burime nga vendngjarja bëjnë me dije se gjatë operacionit për shuarjen e flakëve, një mjet zjarrfikës është përfshirë nga zjarri dhe është djegur. Fatmirësisht nuk raportohet për të lënduar në radhët e efektivëve të zjarrfikëses.
Pavarësisht vështirësive të shumta në terren, të shkaktuara nga era e fortë dhe temperaturat e larta, zjarrfikësit kanë arritur të lokalizojnë vatrat kryesore. Më problematike paraqitet situata në fshatin Jeran, ku flakët rrezikuan seriozisht jo vetëm sipërfaqe të mëdha me bimësi, por edhe banesa të banuara.
Forca të shumta zjarrfikëse nga Bashkia Malësi e Madhe, në bashkëpunim me banorët e zonës, janë angazhuar për orë të tëra për të frenuar përhapjen e flakëve. Aktualisht, situata paraqitet e stabilizuar dhe zjarret janë vënë nën kontroll.
Autoritetet vijojnë hetimet për të përcaktuar shkaqet e zjarrit, ndërkohë që nuk përjashtohet mundësia e zjarrvënies së qëllimshme.
©️zërionline
