Presidentja e Kosovës, Vjosa Osmani, ka ndarë një moment të veçantë me këngëtaren me famë botërore Dua Lipa, duke i dhënë asaj shtetësinë e Republikës së Kosovës me një dekret presidencial. “Mirë se erdhe në shtëpi, Dua!”, shkroi Osmani, duke e cilësuar këtë një nder të veçantë për vendin.
Në ceremoninë simbolike, Presidentja e quajti Dua Lipën një prej personaliteteve më të rëndësishme kulturore dhe artistike në historinë e Kosovës. Ajo nënvizoi se lidhja mes artistes dhe vendit të saj ka qenë gjithmonë e fortë, dhe se Lipa ka qenë një ambasadore e jashtëzakonshme e kulturës kosovare në skenat më të mëdha të botës.
“Dua ka bërë histori me arritjet e saj, duke u shndërruar në frymëzim për miliona njerëz anekënd globit”, – theksoi Osmani, duke shprehur mirënjohje të thellë për ndikimin e artistes në promovimin e rinisë, artit dhe imazhit ndërkombëtar të Kosovës.
Dua Lipa, e lindur në Londër nga prindër kosovarë, e ka përfshirë gjithmonë Kosovën në rrëfimin e saj artistik, duke promovuar kulturën shqiptare përmes muzikës, stilit dhe angazhimeve publike. Dhënia e shtetësisë kosovare është përtej një akti formal, është një simbol krenarie kombëtare dhe mirënjohjeje për gjithçka që ajo përfaqëson.
Kosova, sot më shumë se kurrë, është krenare me Duan e saj.
©️zërionline
