Durrës, 6 gusht 2025 – Një situatë e pazakontë ka ndodhur pasditen e vonë të së martës në bregdetin e Durrësit, ku dy avionë ushtarakë janë parë duke fluturuar në lartësi të ulët mbi zonën e plazhit, duke shkaktuar pasiguri tek pushuesit.
Pamjet dhe informacioni janë sjellë në redaksinë e Zëri Online nga një qytetar durrsak, i cili ka qenë dëshmitar i ngjarjes. Në fotot e dërguara shihen qartë dy avionë ushtarakë që kalojnë shumë pranë vijës bregdetare. Ajo që ka tërhequr vëmendje është se mjetet ajrore nuk janë shfaqur në asnjë moment në aplikacionin FlightRadar, i cili monitoron trafikun ajror në kohë reale.
“Po shëtisnim buzë detit kur papritur pamë dy avionë që fluturonin ulët. Kishin një zhurmë të fortë dhe nuk ngjanin me avionë civilë. Nuk i gjej dot as në FlightRadar”, thotë qytetari që ka sjellë informacionin, duke shtuar se disa pushues, veçanërisht një familje nga Kosova, u alarmuan nga situata. Të tjerë pushues u shfaqën kureshtarë.
“Ua, u kthye lufta!”, – u dëgjua të thoshte me frikë një prej anëtarëve të familjes kosovare, sipas dëshmitarit.
Ngjall habi mungesa e transparencës mbi lëvizjet ushtarake në hapësirën ajrore civile, sidomos në një zonë të populluar si Durrësi gjatë sezonit veror.
Autoritetet nuk kanë dhënë ende një reagim zyrtar në lidhje me këto fluturime, që mbeten për momentin të paidentifikuara. Nuk dihet nëse bëhet fjalë për stërvitje ushtarake të planifikuara apo për një operacion të natyrës tjetër.
Zëri Online do të ndjekë zhvillimet dhe do të publikojë çdo reagim zyrtar për sqarimin e situatës.
©️zërionline
