Një tjetër ngjarje tronditëse brenda familjes vjen nga Burreli, ku një 43-vjeçare dyshohet se ka lyer me benzinë babanë e saj 89-vjeçar dhe më pas i ka vënë flakën. Një histori e rëndë për dhunën brenda familjes dhe marrëdhëniet mes njerëzve më të afërt.
Një ngjarje e rëndë është raportuar në fshatin Rremull të Burrelit, ku një 89-vjeçar, i identifikuar si Adem Mara, ka pësuar djegie të rënda në trup, pasi dyshohet se është sulmuar nga vajza e tij, 43-vjeçarja Majlinda Mara. Sipas informacioneve paraprake, 43-vjeçarja dyshohet se e ka lyer të atin me benzinë dhe më pas i ka vënë flakën. I moshuari është transportuar me urgjencë drejt Tiranës, për trajtim mjekësor të specializuar. Ngjarja është bërë e ditur pas ndërhyrjes së fqinjëve, të cilët kanë dëgjuar atë që po ndodhte dhe kanë nxituar për t’i ardhur në ndihmë 89-vjeçarit, duke njoftuar edhe policinë.
Pas hetimeve paraprake, policia ka ndaluar vajzën e të moshuarit. Ndaj saj raportohet se është ngritur akuza për “Vrasje për shkak të marrëdhënieve familjare”, e mbetur në tentativë. Ndërkohë, motivet që mund të kenë çuar në këtë ngjarje mbeten ende të paqarta.
Rasti nga Burreli nuk mund të shihet vetëm si një ngjarje e rëndë kriminale, po një problem shqetësues. Dhuna që shpërthen brenda mureve të shtëpisë, aty ku duhet të ekzistojnë siguria, kujdesi dhe mbështetja.
Prindër që dhunohen nga fëmijët, fëmijë që përballen me dhunën e prindërve dhe konflikte familjare që në raste ekstreme përfundojnë në tragjedi. Çfarë ndodh me marrëdhëniet familjare? Pse konfliktet që dikur mund të zgjidheshin përmes komunikimit dhe ndërhyrjes së të afërmve, në disa raste përfundojnë në akte ekstreme dhune? A po i kushtojmë vëmendjen e duhur shenjave të para të konflikteve dhe dhunës brenda familjes?
Natyrisht, motivet e ngjarjes në Burrel nuk janë bërë ende të ditura dhe do të jenë hetimet ato që do të zbardhin rrethanat e plota, por një gjë është e qartë se dhuna në familje nuk duhet të trajtohet si një çështje private që duhet mbajtur e fshehur pas dyerve të mbyllura.
Rasti i 89-vjeçarit është një tjetër alarm për rëndësinë e reagimit në kohë, mbështetjes sociale dhe ndërhyrjes së institucioneve përpara se konfliktet familjare të marrin përmasa të pakthyeshme.
Familja duhet të jetë vendi ku njeriu gjen mbrojtje, jo vendi ku rrezikon jetën.
