Ka humbur jetën në Spitalin e Traumës, 15-vjeçari që disa ditë më parë u përfshi në aksidentin rrugor të ndodhur në vendin e njohur si “Qafa e Koshovicës”, në aksin Levan-Fier.
I mituri ishte një nga katër personat që ndodheshin në automjetin e përmbysur mbrëmjen e së premtes, rreth orës 20:00, kur makina humbi kontrollin dhe u rrëzua në anë të rrugës. Pas përplasjes, mjeti filloi të nxirrte tym të dendur, duke rrezikuar shpërthimin.
Në atë moment, efektivi i Policisë së Shtetit, Klajdi Mustaj, 26 vjeç, u bë hero duke rrezikuar jetën për të shpëtuar të aksidentuarit. Ai arriti të nxjerrë nga makina të katër të plagosurit, mes tyre edhe 15-vjeçarin, i cili u transportua me urgjencë drejt spitalit.
Megjithë ndihmën e shpejtë mjekësore dhe përpjekjet e mjekëve, adoleshenti nuk arriti t’u mbijetojë plagëve të marra dhe ndërroi jetë pas disa ditësh në spital.
Autoritetet po vijojnë hetimet për të zbardhur shkakun e aksidentit tragjik.
